Məş Qurbanın inəyi

Mamaqan hekayələri

 

مش قوربانين اينگی

بيرگون واريدی، بيرگون يوخودو
بيزيم ماماغاندا اينک چوخودو
آما اوردا بوغا تاپيلمازيدی
اگر اولسايدی دا چوخ-چوخ آزيدی
هر کس اؤز اينگين بوغازلاتماغا
يول دؤيردی خاصاوانا چاتماغا
توخوم توتماق اوچون اوردا بوغادان
گرک واخت آلايدی عابباس آغادان
سانمایین کي بو يول چوخ راحاتيدی
اينک آياق ايله بئش ساعاتيدی
هله بو دئييل میش دردين هاميسی
اؤزو بير درد ايمیش حئيوان ناميسی
اينک صاحيبينا گه‌لردي چتين
پول وئر، او سؤز، چک عابباسين ميننتين
گولمه‌لي اولسادا بيراز آجييدی
هر حالدا حوکم ائدن احتيياجييدی
مش قوربانين توخونسادا شانينا
آجيلارين پييين ياخير جانينا
بير طهرله قاباقجادان واخت آلير
بازارگونو خاساوانا يوللانير
اينگينده سالير اؤز قاباقينا
اورا چاتماق چکير ناهارچاغينا
اوزاقدان دویاراق بوغانین سسین
سسی ایزله یره ک تاپیر یییه سین
-سلامون الیکيم، علئيک اسلام
-گلين چيخين گؤرک هارداسيز بالام
بو حالدا اوجالیر بوغانین سسی
کؤوشنی تیتره دیر اسلان نعره سی
مش قوربان بوغايا بير نظر سالير
اؤز بيزوو خياليندا جانلانير
بئش تومن پول وئرير دايانيب باخير
عابباس دا بوغانين بندين بوراخير
بؤيوره-بؤيوره گيرير مئيدانا
بوغا دئمه يوخدو تایی بيردانا
هئی اينگين دؤوره‌سينه دولانير
دولانديقجا نرليک حيسسی اويانير
مش قورباندا بو مئيدانين مشقينه
ديقتيلن باخير بيزوو عشقينه
بوغا يامان تؤز قوپارير عرصه دن
قالخير آما توتوزدورور ترسه‌دن
نه سؤيله یيم اوزون سؤزون قيسساسی
مش قوربانين آرتير بيراز قوصصه‌سی
تورشور اوزو, قاشقاباغي ساللانير
بوغانين اليندن اود دوتوب يانير
( تاکي توخوم تؤکولمه‌ييب مهبله
مش قوربانا راحاتچيليق يوخ هله)
باشينا دولانيم دئيير عابباسا
بئش تومن آل بيرده بوغان قوی باسا
خطاسی اولسادا اوگون بوغانین
جوابی منفی ایدی عابباس آغانین
دئيير يوخ-يوخ حئيوان آياقدان دوشر
بيرده نوبت گلن هفته يئتيشر
گؤتور آپار بيرده گل جومعه گونو
ياخشي يئديردره م توپلار گوجونو
گئنه يولا دوشور او يورقون-آرقين
چاتير ماماغانا آخشاما ياخين
اوزون يولون توزو قونموش اوزونه
دئيينيردی يازيق اؤزو-اؤزونه
قيريلايدی بئله بوغانين س....
منيم بير ايشيمي ائيله‌دي ايکی
آللاهين لعنتي بئله حئيوانا
ياخشي موفده فهله اولدوق شئيطانا
قاشقاباق ساللانيب سوپورور يئری
بو احوالدا اوندان سوروشور بيری
نه اولوب مش قوربان هاردان گليرسن؟
بو حئيوانی بوش-بوش نه گزديريرسن؟
دئيير ايشيم دوشوب خاصاوانلييا
آدامين درديني کيمدير آنلييا
عابباس مندن بيراز طلبکارييدی
بئش تومن پول بير گؤت بورجوم وارييدی
گئتديک خاصاواندا منله اينگيم
اونو وئرديک راحات اولدو اورگيم

کريم ماماغانلي