qaçqın körpə

اینقه- اینقه دییه ر گلدیم جهانا
دیدرگین حالیما اؤزوم آغلادیم
دویدوم جهان باتیب جهله چاخانا
بو جهلی گؤره رکن گؤزوم, آغلادیم

یوردوم مئیدان اولدو سویقونچولارا
یاراماز ییرتیجی حئیوان خولارا
حسرت قالدیم بئشیکده اویقولارا
آرتیق چکیلمه دی نازیم آغلادیم

قانلی ساواش گؤردوم اوزوم گولمه دی
دونیا گؤردی ایمدادیما گلمه دی
قارا قیش یوردومدان گئتمک بیلمه دی
گلمز اولدی یاشیل یازیم آغلادیم

الوولاندی بئشیک, پالاز, چوللاریم
شورسولاردان دوشدو قورخونج یوللاریم
قاتقالین دالغالار, اینجه قوللاریم
باجارمادیم نئجه اوزوم, آغلادیم

دلی دنیزلره دالدیغیم زمان
اینصافسیز دالغالار وئرمه دی امان
اونلار آجیماسیز منده ناتوان
آنلاشیلماز اولدی سؤزوم, آغلادیم

 

اوخوجوم آغلاماق یاراشماز بیزه
گؤزیاشیندان درمان اولماز دردیمیزه
غم قاتماق ایسته مم غملریمیزه
غم اوسته کؤکلندی سازیم آغلادیم

نیسگیللی کؤرپه لر سودا بوغولدو
شپه لرله ساحیل لره قووولدو
عمور بو قدرسه نچون دوغولدو؟
بو سیرره بولمادیم چؤزوم , آغلادیم

غم کدر آرتیقدی کریم آز دئدی
ویجدانیم قونودان گئچمه واز دئدی
اوره گیم دایانما دورما یاز دئدی
عاجیز قالدیم نئجه یازیم,آغلادیم

کریم ماماغانلی

 

İnqə-inqə diyər gəldim cəhana
Didərgin halıma özüm ağladım
Duydum cəhan batıb cəhlə çaxana
Bu cəhli görərkən gözüm, ağladım

Yurdum meydan oldu soyqunçulara
Yaramaz yırtıcı heyvanxulara
Həsrət qaldım beşikdə uyqulara
Artıq çəkilmədi nazım ağladım

Qanlı savaş gördüm üzüm gülmədi
Dünya gördü imdadıma gəlmədi
Qaraqış yurdumdan getmək bilmədi
Gəlməz oldu yaşıl yazım ağladım

Əlovlandi beşik, palaz, çullarım
Şor sulardan düşdü qorxunc yollarım
Qatqalın dalğalar, incə qollarım
Bacarmadım necə üzüm ağladım

Dəli dənizlərə daldığım zəman
İnsafsız dalğalar vermədi əman
Onlar acımasız, məndə natəvan
Anlaşılmaz oldu sözüm ağladım

Oxucum ağlamaq yaraşmaz bizə
Gözyaşından dərman olmaz dərdimizə
Qəm qatmaq istəməm qəmlərimizə
Qəm üstə kökləndi sazım ağladım

Nisgilli körpələr suda boğuldu
Şəpələrlə sahillərə qovuldu
Ömür bu qədərsə nəçün doğuldu?
Bu sirrə bulmadım çözüm ağladım

Qəm kədər artıqdı Kərim az dedi
vijdanım qonudan geçmə vaz dedi
Ürəyim dayanma, durma yaz dedi
Aciz qaldım necə yazım ağladım

Kərim Mamağanlı