فورغون

فریادیما یئتیش دوختور افندی
آز قالیر قلبیمین قیریلا بندی

کیم گؤروبدور آفریقادا یا چینده
خسته داشیالار فورغون ایچینده

واللاه نه کرپیجم, نه قوم, نه داشام
نولسام بو اؤلکه ده بیر وطنداشام

نه موللایام پولوم اولسون جیبیمده
نه زار-زار آغلارام منبر دیبینده

نه مدداحام تاپانچام وار بئلیمده
نه رهبر اؤوگوسو منیم دیلیمده

نه آیت اوللاهین هم صؤحبتی یم
نه اصلاح طلبم نه جننتی یم

نه بیر وزارتین صاحب پوستویام
نه حجت ایسلامین مانقال دوستویام

نه بیر گلیریم وار پترولدان گازدان
نه آلیندا نیشانیم وار نامازدان

نه رییسم نه ایختیلاص ائدرم
نه ده بیر رییسین جانین گوده رم

نه جینایتکارا اولارام آرخا
نه یالتاقلا سویوم گئدر بیر آرخا

نه اوغورلوق گلر منیم الیمدن
نه ده خبریم وار نفت دکلیندن

یوخ رضا ضرراب لا آلیش-وئریشیم
بابک زنجانی له هئچ یوخدور ایشیم

نه تانیرام شهرام جزایرینی
نه بیلیرم اونون یاشام یئرینی

نه ایسلام سرداری نه ده قولدورام
قحبه لره چیلپاق ناماز قیلدیرام

نه پلیسم نه ده اینتظاماتام
نه صیغه دللالی نه ده الواتام

سوروشما دینسیزم یا نه دینده یم
اینان صافلیغیمدان من بو گونده یم

ساده بیر اینسانام من بو دونیادا
پورشه م یوخدور دولانارام پیادا

باشیم دؤنسه و یا معده م بولانسا
پولوم یئتمز منیم بیر آمبولانسا

قاباقکی کلینیک لوکس ایدی منه
گئجه سی باخیردی خودا تومنه

اینتقال حکمونو بوگون آلمیشام
فورغونا گؤره ده چوخ یالوارمیشام

کئشگه بو حالیمی گؤره ن اولایدی
رهبره بیر خبر وئره ن اولایدی

بلکه او دا گؤروب اوتانا بیراز
دییه بیر چاره قیل حسن کیلید ساز

کریم ماماغانلی