Əcayib Cümlələr

Mənə zor gəldi dərdim, dərd əlindən gör nələr yazdım
Yaman əfkarə daldırdı, əcayib cümlələr yazdım.

Gözəl sözlərlə dünya qurdum amma, öz xəyalımda
Məni sıxdıqca pulsuzluq gah altın, gah zər yazdım

Evimdə balkona bir qab su qoydum, bir sınıx səndəl
Beş ulduzlu hotel yazdım, Dəniz, okean ,Xəzər yazdım

Vətəndə deprem olduqda inan ki, titrədim məndə
Vətən, kənd, Vərziğan yazdım, Heris yazdım, Əhər yazdım

Bugün yüzlər şekil gördüm yıxılmış palçığ evlərdən
Yazıq mən çarəsizlikdən, ax eyvay körpələr yazdım

Bacı torpaqlar altında sızıldar, qalmış imdadsız
Ana torpaqlar üstunde yolar saç, üz didər, yazdım

Uşaqlar gövdəsin sixdiqca çiykərpic, mən hövlümdən
 Beton yazdım, dəmir yazdım, bina-yi mötəbər yazdım

Bütün aləmdə dövlətlər xəsarati edər cübran
Mənim yurdumda tavanı yazıq millət ödər, yazdım

Rəyiscumhur hani? Harda batıb qalmış hilaləhmər?
Şərəfsizlik aşıb həddindən, olmaz bu qədər, yazdım

Məgər rəhbər bugün, harda gedibdir ...? Əşhədobellah!
ihanət etmədim əsla bu feli müstətər yazdım

Mən əslən şən-i islamə toxunmaq istəməm, yalnız
Oğullar, qızlar, insanlar, vətənsiz, dərbedər yazdım

Nə yazdım mən toxunsun ki, biraz səhv oldu sözlərdə
Yazırdım rəhbər-i islam kırıxdım kəlləxər yazdım

İhanət olsada artıq o mə´sum eşşəyə oldu
Yəqin ya ölçü dar gəldi və ya mən birtəhər yazdım
Münasib cümlə qurmaqçün mən islam iqtisadından
Vətəndə inhisar, anbar ,toyuq, at, çay, şəkər yazdım

Nəhayət xalqa yazmaqçün həzin-nisgilli bir cümlə
Yetim, dilsiz və dövlətsiz, günü gündən bətər yazdım

Könül səsləndi gəl eşqə uyar bir cümlə yaz, məndə
Harmdır eşq, aşıqda, başı, darə, gedər yazdım

Dedi Fərhad-şirin ölkəsində eşqdən yazmaq
Və məndə daşqalaq, ümmət, Daş əllərdə gələr yazdım

Axundi eşq üçün lakin kiçik bir cümlə qurdum mən
Mühəllil, siğə, dəyyus molla, fəhşa, fitnəgərgər yazdım

Və əmma qəlbə quvvət, milli fəxrim, Dahi insanlar
Fədayi, yirmibir Azər,Cəfər və Pişəver yazdım

İgidlik naminə uyqun, başi qarli dağa misdaq
Boyük sərkərdə, yazdım, Qəhrəman yzdım, Səfər yazdım

Uzun bir cümlə istərdim yazam cinsəl təcavüzdən
Birinci allt-i azar, dağa vursan dələr yazdım

Əgər qurban qadındırsa səvab-i Kərbəla hasil
Əgər qurbanlıq ərkəksə, səvab-i həcc edər yazdım

İkinci dəstəmaz, niyyət, zikir zimn-i təcavüzdə
Bu fitva çox müfəssəldir utandın muxtəsər yazdım

Rəyis-i intizamatdan yetərli cümlə yazmaqçün
Namazda, altıca qəhbə, səfə, çılpaq, düzər yazdım

Səfehlik sözcüyündən də gülünc bir cümlə qurmaqçün
Kuruş, bünyanquzar, mənşur, huquq birdə bəşər yazdım

Yoruldum cümlə yazmaqdan, nədəndir dərd qurtarmaz
Yığışdır dəftəri bəsdir, Kərim qardaş yetər yazdım

Sonuncu cümləmi öz vəsf-i halimlə bitirdim mən
Qərib, aşıq, sözüm sadə, ömür, birdə hədər yazdım

 Mamağanli Kərim

İnsan və dev

Vay! budur insan əgər, mən cənavar istərəm
Bircə adamdan sevay canlı nə var istərəm

Gör nə məlul eylədi dünyada insan məni
Öz halıma qalmağa qoymadi bir an məni
İndi yesin istərəm  yırtıcı heyvan məni
Ol ki riyasız məni parçalıyar istərəm
Vay! budur insan əgər, mən cənavar istərəm
Bircə adamdan sevay canlı nə var istərəm

Bir elə heyvan ki, özdilimə dəymiyə
Yurd-yuvamdan məni sürgünə göndərmiyə
Küfr ilə,təhgir ilə  mənliyimi əymiyə
Yırtıcı heyvan vəli, baədəb o tərbiyə
Yalniz acarkən bu tək canə qıyar istərəm
Vay! budur insan əgər, mən cənavar istərəm
Bircə adamdan sevay canlı nə var istərəm

Dev nağılın xırdakən bir neçə yol duymuşam
Mən o devin qorxusun qəlbimə doldurmuşam
İnsanı gördüm dedim, boş xəyala uymuşam
İndi adamdan devə, rah-i fərar istərəm
Vay! budur insan əgər, mən canavar istərəm
Bircə adamdan sevay canlı nə var istərəm

Nənəm demişdi devin hər əməli pisdi,pis
Kimsə hələ görməyib dünyada devdən xəbis
Qəlbi onun daş kimi, kimsəyə olmaz ənis
Heç demədi minləri bir dev edərmiş həbis
yaki qız-oğlanları yollar o kəhrizəkə
Mən baxıram devlərə bunca yaraşmaz ləkə
Dev nə zəman Qırqızı düşman edər Özbəkə
Bircə bu insan işi məzhəkədir,məzhəkə
Vay! budur insan əgər, mən cənavar istərəm
Bircə adamdan sevay canlı nə var istərəm

İndiyə tək hansı dev bunca yəhud öldürüb
Yaki ərəb yurduna harda yəhud doldurub
Bir gecədə hansı dev min kərə tonqal qurub
İnsan əlindən çəkəm dad o havar istərəm
Vay! budur insan əgər, mən cənavar istərəm
Bircə adamdan sevay canlı nə var istərəm

Yrıtıci heyvan deməz hərgələni qoy qırım
qurşalayım daşnağı türkə yapım soyqırım
Bunları gördükcə mən istəyirəm hayqırım
Vay! budur insan əgər, mən cənavar istərəm
Bircə adamdan sevay canlı nə var istərəm

Nənəm demişdir devin çox itidir dişləri
Adam kəbab etməyə vardı uzun şişləri
Dev nə zəman yapdı ki adam yapan işləri
dev düşünərmi məgər bunca fəna düşləri
Vay! budur insan əgər, mən cənavar istərəm
Bircə adamdan sevay canlı nə var istərəm

Qurban olum dev sənə, gəl ye bu insanları
Bir dəfə qurtar bütün bəndə düşən canları
Qoy qara hakimlərin boş qala zindanları
göydə nə ayin, nə din , yerdə nə dar istərəm
Vay! budur insan əgər, mən canavar istərəm
Bircə adamdan sevay canlı nə var istərəm

Harda görübsüz ki dev həqq-i bəşərdən deyə
Nəftə görə qan tökə hər gələni şərliyə
üzdə gülə dost ola, arxada xəncərliyə
Varsa bu insanlara zərrəcə ar istərəm
Vay! budur insan əgər, mən cənavar istərəm
Bircə adamdan sevay canlı nə var istərəm

Sübh-i əzəldən bəri zat-i bəşər böyləmiş
Bu sözü Hafiz necə doğru bəyan eyləmiş
Bu qara torpaqda heç yox bir adam söyləmiş
Başqa bir aləm gərək, bir yeni insan ola
Orda fəqət əhl-i eşq, can ola,canan ola
Bəlkə dönə meylimə çərx o mədar istərəm
Məndə gözəllik, şərab, sevgili yar istərəm

 Kərim Mamağanlı

Dəvənin məqamı

ماده 300 – قانون مجازات اسلاي – ديات:
خون‌بهاي يک زن مسلمان خواه اين قتل عمدا صورت گرفته باشد، خواه غير عمد، 50 شتر است.

ماده 435- خون‌بهاي قطع بيضه چپ يک مرد مسلمان 66 شتر است و خون‌بهاي قطع بيضه راست او 34 شتر و خون‌بهاي قطع هر دو بيضه چپ و راست يک مرد مسلمان 100 شتر است. »

Bizim İranda əcəb qiyməti vardır dəvənin
Dünyada harda belə hörməti vardır dəvənin
Bir müsəlman qadının qanbahası əlli dəvə,
Kim deyərdi bu qədər qudrətı vardır dəvənin

Çox dəvən varsa əlin sox birinin sən ağına
Atmış alti dəvə ver qəsd elə sol daşşağına
Yüz dəvən varsa yetər həm soluna həm sağına
Sənə cürət varici hümməti vardır dəvənin

İnqilab mivəsidir şeyx əkib islam bağına
Bağın abad ola de, gəl yol apar as tağına
Hədiyə et rəhbərə qaşdaş eliyə barmağına
Həm zəri həm zoru həm zinəti vardır dəvənin

Yuxuda görmüşdüm bir gecə həryan dəvədir
Hər nə mömin dəvədir, köhnə müsəlman dəvədir
Şeyx dəvə , molla dəvə , rəhbər-i İran dəvədir
Ətomu, Əmniyəti, dovləti vardır dəvənin

Bir zamanlar varidi bilməzidik kimdi dəvə
Tanıyınca biz onu boynumuza mindi dəvə
Otuz ildən də çox oldi bizə hakimdi dəvə
Bəsici, pasdarı həm ümməti vardır dəvənin
Kərim Mamağanlı