Vəhşi daşqalağın qurbanı Qadın

                             

Hər zəman şərəflə çəkilir adın

Məhəbbət ocaği hörmətli qadın

Ey qəhrəman doğan igid bəsliyən

İnsana varlıği sən bağışladın

Varlığın ən qaynar çeşməsi qadın

Insanlıq gözünün sürməsi qadın

İncəlik bağının mivəsi qadın

Gözəllik dağının zirvəsi qadın

Öz tanrılığına sən inanmadın

Yer üzün aradın göyə sıtqadın

Oldun daşqalaqın qurbani qadın

Varlıqın, həyatın yarisi sənsən

Həyata bal desəm arisi sənsən

Tomris anaların varisi sənsən

Ana deyim sənə, xanım ya xatın

sevginin,sevincin qaynaği qadın

Səni oxşadanlar yarıminsana

Gərək şərm eyliyə, ölə,utana

Sən həmi insansan həm ona ana

Bütün bəşəriyyət sənin övladın

Şirin laylaların qucaği qadın

Hər zəman yoldaşın dara düşəndə

Onun qəm-kədərin bölüşdün səndə

Yoldaş həsrətilə öldün öləndə

Nə unutdun onu nə yadırqadın

Sənə alqış olsun vəfali qadın

Laylalar süzülüb sənin dilindən

Mahnılar yaranıb hər nisgilindən

Hərvax cəfa gördün öz sevgilindən

Sən səssiz-səmirsiz yanıb ağladın

Səbir məktəbinin ünvani qadın

Qanli savaşlarda qənimət oldun

Hərəmsəralarda sən zinət oldun

İnsana dərd oldun müsibət oldun

Səsin insanlığa çatdıranmadın

sinəndə boğuldu nalən,fəryadın

Oldun daşqalaqın qurbani qadın

Şəriət gözündə naqis göründün

Qorxuların qıynağında süründün

Cəhlin qara bayrağına büründün

Gözəlliyi sən çarşaba çulqadın

Vahşi daşqalaqın qurbani qadın

Ey candan pay verən canlar yaradan

Könlün yasdan qutar günün qaradan

Bürünmə çarşaba çıx çadıradan

Falçıdan seyiddən kəs etiqdın

Olma daşqalaqın qurbanı qadın

Yırtıcı quvvələr qorxunc yasalar

Çox yaşar qadınlar oyanmasalar

Əski inanclara inanmasalar

Yolumuz saf olar günümüz aydın

Olmaz daşqalaqın qurbanı qadın

Kərim Mamağanlı

Bayram olacaqdır

Bayram olacaqdır

Qəm çəkmə könül qış gedə bayram olacaqdır

yaz qoysa qədəm bir gözəl əyyam olacaqdır

Əyləncədə mey gəzdirəcək ortada saqi

Qəmlər dağılıb əldə qızıl cam olacaqdır

Çal söylə sevin qış gedə bayram olacaqdır

Güllər açacaq yurdumuzun Çənlibelində

Türkün balası dərs alacaq türkü dilində

Baş qaldıracaq Urmu. Sərab. Ərdəbilində

Şe´r ilə Ədəb dəryası pəndam olacaqdır

Çal söylə sevin qış gedə bayram olacaqdır

Yaz gəlmədədir qarlı soyuq çillə nəlazim

Türkcə danışarkən bir uşaq sillə nəlazim

Min fitnə oyun şanlı-şirin dillə nəlazim

Bilməm bu oyunlar nəvax itmam olacaqdır

Qəm çəkmə könül qış gedə bayram olacaqdır

Qəm çəkmə zəfər təblini Ərk üstə çalarsan

Eldən səs ucaldıqca o səsdən güc alarsan

Divanda qurarsan rasistdən öc alarsan

Satqınlar o gün gör necə bədnam olacaqdır

Qəm çəkmə könül qış gedə bayram olacaqdır

Murdar bu qaranlıq əbədi şam olabilməz

Yurdumda maral özgələrə ram olabilməz

Bundan sora azərbalası xam olabilməz

Dığlar ana görsə balası xam olacaqdır

Yox qoxma ana, Qış gedə bayram olacaqdır

Sürgündə sən ey xəstə quş ovhamdan əlçək

Gəl haqqa diyək haq, pisə pis, gərçəyə gərçək

Birlikdə zəfər var atalar söylədi göyçək

Birləşməsə ellər genə nakam olacaqdır

Gəl birləşəlim qış gedə bayram olacaqdır

 Torpaq oyanır səndə oyan yol tanı qardaş

Vurma buqədər öz kökünə baltanı qardaş

Türk olmasa gər öz evinin sultanı qardaş

Nə tel susacaqdır nə dil aram olacaqdır

Ancaq görürəm qış gedə bayram olacaqdır

Dostu tanisaq dünyada biz olmarıq itgin

Düşmani qanarkən ona biz bağlıyarıq kin

Min mərtəbə olsun bizədə lənətü-nifrin

Bizlərdə əgər zərrəcə ovham olacaqdır

Yox olmuyacaq qış gedə bayram olacaqdır

Kərim Mamağanlı


بایرام اولاجاقدیر


غم چکمه کؤنول قیش گئده بایرام اولاجاقدیر
یاز قویسا قدم بیر گؤزل ایّام اولاجاقدیر
ایلنجه ده مئی گزدیره جک اورتادا ساقی
غملر داغیلیب الده قیزیل جام اولاجاقدیر
چال، سؤیله، سئوین قیش گئده بایرام اولاجاقدیر

گوللر آچاجاق یوردوموزون چنلی بئلینده
تورکون بالاسی درس آلاجاق تورکی دیلینده
باش قالدیراجاق اورمو، سراب، اردبیلینده
شئعرایله ادب دریاسی پندام اولاجاقدیر
چال، سؤیله، سئوین قیش گئده بایرام اولاجاقدیر

یاز گلمه ده دیر قارلی سویوق چیلله نه لازیم
تورکجه دانیشاركن بیر اوشاق سیلله نه لازیم
مین فیتنه، اویون شانلی- شیرین دیلله نه لازیم
بيلمم بو اويونلار نه واخ ايتمام اولاجاقدیر
غم چکمه کؤنول قیش گئده بایرام اولاجاقدیر

 غم چکمه ظفر طبلینی ارک اوسته چالارسان
ائلدن سس اوجالدیقجا او سسدن گوج آلارسان
دیواندا قورارسان راسيستدن اؤج آلارسان
ساتقینلار اوگون گؤر نئجه بدنام اولاجاقدیر
غم چکمه کؤنول قیش گئده بایرام اولاجاقدیر

موردار بو قارانلیق ابدی شام اولابیلمز
یوردومدا مارال اؤزگه لره رام اولابیلمز
بوندان سورا آذر بالاسی خام اولابیلمز
دیغلار آنا گؤرسه بالاسی خام اولاجاقدیر
یوخ قوخما آنا، قیش گئده بایرام اولاجاقدیر

سورگونده سن ائی خسته قوش اووهامدان ال چک
گل حاققا دییک حاق، پیسه پیس، گرچه یه گرچک
بیرلیکده ظفر وار آتالار سؤیله دی گؤیچک
بیرلشمه سه ائللر یئنه ناکام اولاجاقدیر
گل بیرلشه لیم، قیش گئده بایرام اولاجاقدیر

تورپاق اویانیر سنده اویان یول تانی قارداش
وورما بو قده ر اؤز کؤکونه بالتانی قارداش
تورک اولماسا گر اؤز ائوینین سولطانی قارداش
نه تئل سوساجاقدیر، نه دیل آرام اولاجاقدیر
آنجاق گؤرورم قیش گئده بایرام اولاجاقدیر

دوستو تانیساق دونیادا بیز اولماریق ایتگین
دوشمانی قانارکن اونا بیز باغلییاریق کین
مین مرتبه اولسون بیزه ده لعنت و نیفرین
بیزلرده اگر ذرره جه اووهام اولاجاقدیر
یوخ اولمویاجاق، قیش گئده بایرام اولاجاقدیر

ماماغانلی کریم